يقولون اذا ضاقت عليك الوسيعه
ادعس على همّك ورد اعتبارك
وان كان ماطاعك عنى الوقت طيعه
خل القدر وحده يحدّد مسارك
وان طحت جبراً خل نفسك رفيعه
في مجلس الاجواد خلّك مشارك
واعلم ترى عمرك مجرّد وديعه
تذهب وتفنى لو يطول انتظارك
حتى ولو موتك علينا فجيعه
مصيرنا مثلك لو القلب زارك
وان كنت تحسبها ليالي شنيعه
فأعلم ماغير القبر ياصاح دارك
واليا شريت الطيب فأحذر تبيعه
وان كان بعته مايفيد اعتذارك
وان كان قلبك في ليالي ربيعه
بكره يجيه الصيف ويشب نارك
والله مادامت حياتن بديعه
ولا يدوم الا الكريم المبارك
ياخلّي اللي قد نويت القطيعه
والله ما اردّك وهذا اختيارك
لاكن اذا ضاقت عليك الوسيعه
ادعس على همّك ورد اعتبارك