[سعد بن عادي]

ياأمل ، لن شفت راس الياس بيّن .. دوسه
مايعيش الياس .. في قلـبٍ يحـبّ اعيـاده
ياأمل ، وارجع على راس الوليف .. وبوسه
وقول له : صدري على طول الحياه .. بلاده
ياأمل ، دام الحروف الصادقه .. محسوسـه
ليش !! مايقنـع تواصلنـا .. بلقمـة زاده
ياأمل ، دام الغلا .. لبـس الوفـا ملبوسـه
ماعليْه خلاف .. لو فـرّق وجيـه اسيـاده
ياأمل ، من تجربة عمري .. حفظت دروسه
وكم شربت المرّ قبل الحلو ! .. من ميراده
ياأمل ، درب الشقـا ماهـوب للمحروسـه
والسعـاده ، ماتـذاق الاّ علـى السجّـاده
ياأمـل ، كـم آدمـي ! حريّتـه محبوسـه
يوم حرّر للهوى موتـه .. واكـل ميـلاده
ياأمل ، لو ينفتح ضرس العقل .. للسوسـه
ورّدت راعيـه فـي دهويّتـه ، وزيــاده
ياأمل ، والشعر مسحوبـه علـى منكوسـه
ماايعبّر عـن مشاعـر شاعـرِه ، كالعـاده
ياأمل ، واللي عطى بنك الوليـد .. فلوسـه
مايُثمَّن ، حـب ابـن زيـدون فـي ولاّده