[سعد بن عادي]

فل الحجاج وخل عنـك الهواجيـس
كـلٍ يمـوت وحاجتـه ماقضاهـا
واعلم ترى بكره يجي لـه تعابيـس
وصفـو الليالـي مالحقنـا مداهـا
انا بشر كتلة مشاعـر واحاسيـس
ودنيا البشر محدن عرف وش وراها
ولاتزعج الخاطر بكثـر الدنافيـس
ربك كفـل رزق العبـاد وكساهـا
وخلك من اللي يبعـدون المراميـس
اللي على الطـالات تسبـق يداهـا
اللي ليا عدوا هل الخيـل والعيـس
عدوا مع اهل الركـب الأول لواهـا
ولا تسلـم الدنيـا بليـا عواكيـس
مرا هماج ومـر يـا حلـو ماهـا
في طرقتك معها تجنب من الهيـس
لاعاكسـت خوتـك صـد ونساهـا
وياصاحبي خلك مع اهل النواميـس
كسابـت النعميـن شوكـة اعداهـا
أهل القنا ومعسكـرات السواديـس
ماهيـب تشقـر للقبيلـه عصاهـا
واحذر تجيب أهروج من غير تقييس
كم كلمةٍ تحسب على مـن رواهـا