.
.
من عام والطير لا رفرف ولا غرّد
وش عنده اليوم قام يجر الألحاني
.
ماني بخابره لا ضامي ولا مشرّد
يمكن جذبه الحنين لخدر الأعياني
.
لبيه لبيه يابو خدٍ مورّد
اللي ليامن ذكرته فزّ وجداني
.
ابوجديلٍ ( دليق ) وخصرٍ مجرّد
كنّه من الغي يامرني وينهاني
.
صوته عن الناس متميز ومتفرّد
لا من طلبني وقال ( اقصد ) على شاني
.
اسوق ذود المعاني جمْل ومفرد
نجايبٍ زينها فطري ورباني
.
غفلٍ من إنتاج فكري مابها حرّد
ممنوعة البيع بس الشوف مجاني
.
كله على شان من له ( قصرٍ مّمرد )
بين الحنايا ويكتبني ويقراني
.
اقبلت يمّه وتو الجو مابرّد
عجلٍ على شوفته والشوق يحداني
.
دقيت رقمه وصوته بالحشا ورّد
ولاصدّر إلّا بيوت الشعر تنخاني
.
ياليتني يوم ادقه ( لم يتم الرد )
وصبرت حتى أشوفه واحفظ لساني
.
من كلمة تقتفيها ناس ٍمقرّد
وتزيد من عندها والناس تبلاني
.
والسالفة بيت جاني بارد مبرّد
قعدت اغنيه مدري وين وداني
.
حتى استوت لي بيوت كلها شرّد
اسمي عليها وتوقيعي وعنواني ..!!
.
..
...
..
.
اسم القصيده وقائلها :
" من عام "
للشاعر المبدع / عطاالله ممدوح
....