أقول الوسم وش خلى سحابه ينحدر للشرق؟=ترك كل الجهات ولا تغير في محاديره
نويت آعارض غيومه وأسافر مع غريب الطرق=أبدري هو صحيح أن المطر محبوبته ديره
عسفت الغيمه الشارد ،، ولانت لي حبال البرق=وتعلقت بمعارف مهرتي ياعلها خيره
فهقت طويق ولي قلب يغني في نخيله ورق=وتسابق للثرى وابل دموعي من تباشيره
وللصمان في قلبي صواب وطعنتين وحرق=مداهيل الهوى الآول عسى تزهر نواويره
وبانت لي (الكويت) ولا تبين في المحبة فرق=أنا في دار خلاني ولي في غير النسب جيره
عرفت الوسم وش خلى سحابه ينحدر للشرق=ترك كل الجهات ولا تغير عن محاديره
بدر بن عبدالمحسن