وأضغط صفر خمسه مع الصفر تخمين
ثـم فـز جوالـي بريحـة عبـيـره
صوتٍ يجر القلـب هـو والشراييـن
تغنجـه بالقلـب حـالـه خطـيـره
قالت اللوه.. قلت أوه يابنت مخطيـن
منـك السمـاح وكـل واحـد بديـره
حاولت ابـرر كذبتـي قلـت داقيـن
على الرقـم يابنـت قبـل الظهيـره
قالت ابد ماهو انا قلـت اجـل ميـن
قالـت ماهـو جوالـنـا ياعشـيـره
قلت اسمعيني زيـن يابنـت تكفيـن
أنـا حشايـا مـن الكـذب يأمـيـره
دقيت رقمـك والله أعلـم بالامريـن
مالي سواء رقمـك يدينـي سعيـره
قالـت هلابـك عـد ماقالـو أهليـن
وأعـدا حـراً فـاع بـأول مطيـره
من قبل نبدى أنت يالحلو مـن ويـن
قلت الديـار اللـي بوسـط الجزيـره
غزلا وحبـه داخـل القلـب والعيـن
عنـد اللـوازم لـه فعايـل شهيـره
قالت لي شاعر قلت من خمسة اسنين
شاعر ولي فالشعـر مخـزن ذخيـره
اللعب بشعري لعب زيـدان بالصيـن
لامـن تفنـن وعوكـس المستديـره
قالـت انـا ماحبـكـم يالبـداويـن
ماتلبسـون إلـى ثيـاب العسـيـره
ماعندكـم موضـه ولا أنتـم غنيـن
النـاس وصلـت للثيـاب القصيـره
أنت بـدوي والبـدو ماهـم بداريـن
عـن التقـدم والحيـاة البصـيـره
بـاص الحظـاره فاتكـم يامساكيـن
الباص فاتك وأنـت عفـت المسيـره
قلت اسمعي صدرت بعض العناويـن
وقولي ترى المكتوب واضـح بغيـره
صحيح انا مخلوق يابنت مـن طيـن
والديـن سـاو النـاس بالمستديـره