على هامش حياتي .. تكبر احزان وتموت آمال
تحت ظل الظروف اللي .. مرابعها .. ورى صدري
كبرت .. وشحت ارضي بالعطا .. والشح فيها طال
وانا ادعي ..يا عسى خيط الامل ما يحرقه جمري!
تموت من العطش غابة ..واردد للشجر لا مال
سقاك الغيث .. يا ظل السباع .. و راحة القمري!
بعد صارت جفاف .. وما لقى قلبي بها مدهال
بعد صارت ..عروش ٍ خاوية .. قلت : اغتنم عمري
نويت ارحل .. مع انسام الهبوب .. ومع سراب اللال
نويت اشطب على سود الظروف .. وحيرتي بأمري
وقفت .. اجمع شتاتي .. والزمن فرقى .. وضيقة بال
وقفت .. ولا قدرت اصمد ..وخفت ابكي وانا ما ادري!!
تقبّلت الظلام .. ووحشة الطرقة بعزم ابطال
تناوشني.. مخاليب الظروف .. و تنتظر كسري
تركت اغلى الاماكن .. تحتظن حلمي .. وراس المال
وانا ادري.. لو قسى حكم الزمن .. تبقى على خبري
رحلت .. اشرب مع انفاسي ضما .. والجوع ما له فال
رحلت .. وقلبي ترفرف عروقه .. تفتقد وكري
رحلت ..اكابد الغربة.. واساير ضحكتي محتال
وحيد .. افرش من احزاني بساطي .. والتحف صبري
بقى لي .. وش بقى لي .. يا ( صدى صوتي ) ولا ينقال
سوى صوت ٍ .. ولو ما له صدى .. ما اتوقعه جهري *!