يا أبوي حبك وسط قلبي يبني كبار الصـروح
يشهد على ما اقـول عـلام الخفايـا كلهـا
يا أبوي شوفك يبري العله وتشفى به جـروح
ولا غبـت دار ٍ ماتجيهـا مايظلـل ظلـهـا
أرتاح لا شفتك بخير و ضيقتي عنـي تـروح
شوفك يكفيني عن الدنيـا ومـن فـي حلهـا
أنت الأبو و أنت الأخو و أنته رفيق ٍ لي نصوح
ياكم نصيحه منك جتني لين صرت أفطن لهـا
ياتاج راسي يا بعد روحي يا أبو قلب ٍ سموح
إن كان ما القيفان غنـت فيـك ليـه أشلهـا
يمناك من فوق القمم بالطيبـه دايـم تلـوح
واسمك على روس السطور العاليه محتلهـا
لك فالحشا حب ٍ كبير ٍ مـا توفيـه الشـروح
تعجز بيوت الشعر عن وصفه بوسط سجلهـا
أنت الأمل عندي وبري فيك مابعـده طمـوح
والطيبه منّك و مـن طيبـك عرفـت أدلهـا
من صغر سني مصغي ٍ لك دوم لا شفتك تبوح
يالشامخ اللي وقفته من فالعرب ياصـل لهـا
شيخ ٍ وبابه ما يـرد و دلتـه دايـم تفـوح
كريم و صفات الكـرام الطيبـه كفـو ٍ لهـا