يـا ذو الجـلال منـزّل القرآنـي=انـت الإلـه .. ولا إلـه ثـانـي
يا باسطٍ ارضك ومعلـي عرشـك=ويا مفضّل المسلم على النصرانـي
انا الضعيف اللي سجد لك .. وجهه=يخشى العذاب ويطلـب الغفرانـي
سبحـانـك اللهم إنــي تـائـب=من زلة اقدامـي ونطـق لسانـي
يا وجد حالي من تِـردّي الحالـه=كلي حـزن وادنـات مـا بكانـي
احس في صـدري لهيـب وتكـه=وهزة ضمير تهـز كـل اركانـي
ما فيه موتٍ مثـل مـوت الفجـأه=حتى لو ان عمر البنادم .. فانـي
كم واحدٍ يضحك وهو مـا يـدري=انـه مَديـن وخلـفـه الديـانـي
امـا تقـفّـاه وخــذاه بثـوبـه=والا عطاه الوجه .. فـي ثوانـي
يا أبو مشاري رحمـك المولـى=حزني عليك .. اماتنـي واحيانـي
الله ما اقوى صدمتي فـي موتـك=تقول كنـك واحـد مـن اخوانـي
الطيـب واجـد والمزايـا عــده=وسيرتك هيّ شهودي .. وبرهاني
متألّـقٍ .. شخصيّـاً وفكريّـاً=وشموخ لا يِخفـى .. ولا يخفانـي
الله يأمّـن روعتـك فـي قبـرك=ويجبر عزانا كلنـا .. مـن دانـي
ارثيك .. ماهو لجل اسجل موقـف=حزنٍ جديد .. وصار ضمن احزاني!