[عبدالله الحميدي]

اخي عويض بن شامان
الله يبارك بأيّامك وانا اللي سعيد بوجودي بينكم ..
والشكر الكثير على هذا الكرم واللطف من شخصك الرائع..

1/
عن الغياب انا احب الظهور اذا كان عندي شي يستحق التواجد ,
واحاول ان لا اكرر نفسي على الناس , وخلال الفتره الجايه انشالله بتشوف حضور يعجبك انشالله.
اما مناسبات القبيله فلم توجه لي دعوات رسمية تخص القبيله بشكل عام ,
ماوصلني دعوات اعراس ودعوات من اشخاص يحتفلون لانفسهم وليس للقبيلة ,
وهذا الحفلات غالبا ماتكون عشوائية بتنظيمها ومسيئة للشاعر
وللشعر عدا شعر المحاورة ,
ولا احرص على حضورها لان الجمهور لم ياتي ليسمع الشعر
والشاعر فيهايكون شيئا غير اساسي
والناس غير مهتمه بما يقول ..
2/
الجديد الذي لم ينشر ما اكتمل والله ياعويض , والا يشرفني والله وانت تامر امر ..
وهذي اخر ماكتبت واتمنى انها ترتقي لذوقك:

اضحن عيوني سهارى .. واقردن فيه
واقردت بافكاري , وباقدام رجليّه
ماغير رايح وراجع, داله وذاكر
ادله , يالو ماونس لفرقا الخوي كيّه
باقي بصدري شويّ وتذرف عيوني
وعزايه إن الليال ترجّعه ليّه
هي كلّها خمسة اعوامٍ من الفرقا
لو يومهن عام , والعام بثلاثميّه !
صديق روح , اخو دنيا , صادقٍ صافي
سافر.. منين لمكانه واحدٍ زيّه ؟!
كله وحشني قبل ميزاته .. عيوبه
كنّه زرع وحشته بأصابع ايديّه !
صارن سواليفنا, وضحكاتنا من اوّل
اذوقهن ذكريات بطعم مرثيّه
وزودٍ على احساس بعده عني.. اتلفني
احساسي إنه ماعاده بالسعوديّه
طوّعت لفراقه الليله ورق قلبي
لو اخترع لجله حروفٍ هجائيّه
بكتب عنه , واكتبه , واكتب له , وتنبت
بين السطور ابتهالاتٍ .. وداعيّه
الله يسدّد خطى اقدامه , ويسترهن
من كلّ خطوة ظلام اتسير ملويّه
فكّرت اسمي _من اجله_ قلبي ( امريكا)
حتى اني احسّ بانّه.. عايشاً فيّه
يابعدها ديرة , وياغلوه مسافر
له التحيّات .. مفلوله,ومطويّه
مفلولةٍ للرياح اللي تناقلها
ومطويةٍ بالغلا طيّه على طيّه
ياديرة العمّ سام.. اللي مهاجر لك
صدوق احاسيس , صادق هرجه ونيّه
ياقاه ربّ الاراض السبع من ارضك
وامكايد عيونك الزرق السياسيّه
امطرشٍ لك من ارض الخير, متنومس
خطوه لحاجه ماهي خطوه سياحيّه
من ديرةٍ وجهها السيف( وكتاب الله
ملبوسها بعطر توحيد الالوهيّه)
لو كان للارض روح وكانت الكعبه ؟
كل الاراضي تموت, وهي بقت حيّه
وسمّيت قلبي على اسمك يوم ماسافر
وصوتّ: ( يامريكا.. يامريكا).. ازهمك فيه
وماردّ قلبي.. وقال : إن كان تبغاني
البّي ليا زهمت؟.. ازهم بأساميّه
قلت : آنا هالحين ماسمّيتك امريكا ؟!
ماذكر لك اسمٍ سوى هالاسم موليّه !
قال: انت غيّرته ومانيب مستسمي
على اسم ديره .. ياكود اسم ( السعوديّه)

شكرا ياعويض على هذا الحضور الذي يزيدني فخرا ..
ممتن وشاكر لك من كل قلبي