الناس تفرح بالشعر لا تألمت
ــــــــ و أنا لي الله .. يا الظروف العنيدة
للحزن عمري و البلى ما تكلمت
ــــــــ ضيقة قديمة من وراها جديدة
لو الأدب .. !! فالناس ينقاس بالصمت
ــــــــ الصمت فيني .. كم كتب من قصيدة ؟
وش عاد لو بيني و بين الشعر همت
ــــــــ مسراي موحش و المنافي بعيدة
كني على بند المواجع ترسمت
ــــــــ شاعر .. ( يخاف أن الأماني تبيدة )
أعيش حلم أستكمله كلما نمت
ــــــــ و أصحى بعلم يهد حلمي و أعيده !
وحيد لكني بنفسي تزاحمت
ــــــــ هذا و أنا وحدي و نفسي وحيدة !
يا كثر ما بيني و بيني تلعثمت
ــــــــ بين أبسط حقوق الفقيد لفقيده
للراحلين وجيه فيها تعشمت
ــــــــ يطرون لي دايم مع أول شريدة
باسبابهم ( لله ) ياما تبسمت
ــــــــ من بعدهم حتى حياتي زهيدة
سلمت وجهي للمدى ما تسلمت
ــــــــ إلا رجل مغبون حزنه رصيده
يكذب على نفسه بكلمة ( تأقلمت )
ــــــــ و تصدق الكذبة ( مشاعر فريدة )
و أقول خيره بالتجارب تراكمت
ــــــــ دنيا بها [ كل يوم شي أستفيده ]
اللي مبعثرني و أنا ما تلملمت
ــــــــ ماني براجي منه لحظة سعيدة
ياما و ياما عن همومي تغيشمت
ــــــــ و قلت [ ربي يفعل اللي يريده ]
من حزة الغيبه وعن موقف الشمت
ــــــــ الله يجنبني " هروج النقيدة "
لكن على أية حال يكفي تعلمت
ــــــــ من وحدتي و الناس جملة مفيدة
أنا مع نفسي لو أني تفاهمت
ــــــــ أغناني الله عن بقية عبيدة