السلام عليكم ورحمة الله وبركاته
اسعد الله مساكم بكل خير
أنقل لكم جديدي وأتمنى أن ينال أعجابكم
ياوجودي كل مذكر صاحبن يوضي جبينه=أتنهت كن بي نارن توقد وسط جوفي
وجد من يحزن ليا منه ذكر ماضي سنينه=شايبن يردف على الونه كثيرات الحسوفي
ماجداه الا يون وماش له أحدن يعينه=مانجب غير البنات الي تعينه بالوقوفي
ثالث الاقدام حاجونه مراكيها يمينه=ويتقداء قاصرُ لامد شوفه مايشوفي
له بنات ولا تصور وضعهن من عقب عينه=تذرف عيونه دموعه ثم يصفق بالكفوفي
والله أني مثله اون وجروحي بي دفينه=وبالزمان الشين حدتني عواريض وصدوفي
كني الي واطين جمره وهو مخفي ونينه=مايبي أحدن بحاله لا تبصربه يروفي
المولع مايولع جمره الا من حنينه=احتوى جمر الغلا ثم ضيع أشكال الحروفي
أستطاب الجمره الحيه وناولها يدينه=كنه الي شال حتفه ورفعه فوق الكتوفي
أتصبر والصبر لاطال مايقطع يقينه=غير احلامن تراودني تلوف القلب لوفي
مل قلبن بالهوى يرجف مثل رجف المكينه=كل مايطري زمانً فات مع زين الوصوفي
يوم كان الوصل جسره قايمً بيني وبينه=قبل يهدم جسرنا بحرً له أمواجً تطوفي
بحرً أسود أغلب العربان قبلي سابحينه=ومن طلع من ظلمته لو يذكرونه جاه خوفي
صاحبي بيني وبينه نذل طحنا في كمينه=لو له روح أذبحه ورد عن شوفه ضيوفي
مير أبصبر والهقاوي بالبحر مثل السفينه=توصل لبر الامان الي حضن ناب الردوفي
والليالي دورها تجمع خدينن مع خدينه=والله اني للتلاقي بعد فرقاها ولوفي
الوصل ربيع قلبي يوم فرقاها سنينه=الله يحقق شفوفي والله يسمح ظروفي
ماعلى قلبي من الي عن شفوفه عاذلينه=كن أذني عنه صقها من عذلني عن شفوفي
أذني الاولى بها طينه وبالاخرى عجينه=ولو يزيد العذل عيني في وليفي ماتشوفي
الامل في صفحة العشاق حنا كاتبينه=صفحةً ماهيب تقرى ثم توضع بالرفوفي
والطريق اللي بدينا به لزوم مواصلينه=هقوتي من بعدها ترقا على روس الطفوفي
والعذل ياهل العذل بكره لكم يرجع غبينه=لن جهدن اجتهدتوبه على غير مخلوفي
وسلامتكم