التسول بالمملكة مهنة وليست حاجة !!
كل عام والجميع بخير
بصراحة موضوع التسول عندنا بالمملكة ملحوظ بشكل مستمر وهذه المهنه المسكوت عنها تقريباً 50%
ومكافحة التسول نشاطها محدود جدا في القضاء على هذه الظاهرة المستمرة ، والمؤسف انه اذا هربت لك خدامة قالوا رح لمكافحة التسول ........... وش دخل الهروب بالتسول !؟!؟ وصاير شغلهم اغلبه تجميع خدامات !!!
كتبت هالموضوع من مشهد اعتدت عليه من عشر سنين وانا هنا بالجبيل الصناعية ، فيه شحاذات في حي الفيحاء عند محطة الخنيني هن وبزارينهن لهن اكثر من عشر سنوات ، تجي سيارة تنزلهم والمغرب تاخذهم .
يعني يزاولون عملهم بشكل يومي ، وكذلك عند المحلات الكبيرة بنده والمزرعه !!!
اضافة الي الشحاذات في باقي معظم المناطق.. تلقاهن اربع كل وحده عند اشارة ومن زود قلة الحياء تطق عليك زجاج السيارة ( افتح غصب)!!! وواضح عليهن غير سعوديات .
والشغله لها سنين مستمرة بشكل يومي
والعجيب في الامر اذا شفت الشحاذه عند السوبر ماركت وعندها طبعا ولدها لزوم الشغل وكسر الخاطر العجيب ان الطفل مايتحرك ولا يروح يلعب بعيد حولها  مدري شلون مدربته على الجلوس ... مع ان باقي الاطفال بالصعوبه يجلس بمكان واحد . !!
طبعاً كلنا نعرف ان الشحاذين عصابات تدار من قبل رؤساء لهم ويجندون الاطفال الذين يحصلون عليهم من الخارج او من الخطف ويجندونهم بشكل منظم ويدرون عليهم اموال كثيرة ، حسبي الله عليهم .
ولفت انتباهي قبل فترة برنامج عن جمعيه خيرية بجدة تكافح التسول بجمع هؤلاء الاطفال وإعادة تأهيلهم وتعليمهم الصح من الخطاء جزاهم الله خير .
عموما انا متأكد ان هناك فعلا ناس محتاجين ولكن قلة وبعضهم لاتعرفهم من التعفف ولايسألون الناس إلحافاً يقول الحق تبارك وتعالى في محكم تنزيله: {للفقراء الذين أحصروا في سبيل الله لا يستطيعون ضرباً في الأرض يحسبهم الجاهل أغنياء من التعفف تعرفهم بسيماهم لا يسألون الناس إلحافاً وما تنفقوا من خير فإن الله به عليم» وهؤلاء هم من يستحقون ان نبحث عنهم ونعطيهم مما عطانا الله وطبعاً للمحتاج هناك جمعيات خيرية من وفاعلين الخير كثر ولله الحمد لكن السيئ يخرب على المحتاج فعلاً .
ودائما تجد المتسول فصيح اللسان إذا وقف بالمسجد يشحذ الناس ( قدر الله عليه بكذا وكذا ... ) تجده افصح من الخطيب ويتباكا ويحاول كسب عطف الاخرين
اما المتاج صحيح فصدقوني لو يقف امام الناس لايستطيع التحدث لرهبة الموقف !!!
ونأمل من مكافحة التسول زيادة نشاطها وتوظيف اكبر عدد من الموظفين للقضاء على هذه الظاهرة المنتشرة .
آخر تعديل بواسطة عبدالرحمن البراك ، 23-08-2010 الساعة 12:28 PM.
| توقيع عبدالرحمن البراك |
|
|