تقول صدفه ! ما هقيت الي حصل كله صـدف
اصدق الصدفه تجـي مـره واصـدق مرتيـن
لو قلت ابكتب قصتي حبر القلـم كلـه نشـف
لكن اعرفك تفهميـن القصـد حتـى بكلمتيـن
من وين اببـدا قصتـي اقولهـا بليـا اسـف
شي مضى وشي انطوى واشيا خلت ويا السنين
خليني احيا لحظتي وانـا معـك كلـي شغـف
خليني ارسم لوحتي وابـدا بشعـرك والجبيـن
وارسم عيونك واعتذرلك اعذريني مـا اعـرف
عينك شكل لامن تبسمتي وشكل لو تضحكيـن
الوان عينك في عيوني يـا عيونـي تختلـف
والوان مرسامي معك عيت تجي وعيت تزيـن
تدرين بطلت الرسم عقبـك وبطلـت التحـف
انتي تحفتي دنيتي وانتـي جبرتـي كسرتيـن
القلب يرجف كذب ومن شفتك ترى قلبي رجف
لكن عرفت انه رجف عقبـك وغطـاه الحنيـن
حتى قصايد دفتري عقبك غدى لشعـري هـدف
اكتب مشاعر صادقه والقافيـه صـارت تليـن
يازين قولة ( سم ) يا بنت الغلا بنت الشـرف
يـا عـل دار لطفـك يرعـاه رب العالمـيـن
الليل لو طول عتم عقب / شروقـه / ينكشـف
والدار من عقبك صفى وغدى شذاه الياسميـن
الخاتمه هذي مشاعر سقتها لك حـرف حـرف
اقري القصيدة تكتمل باوزانهـا لـو تسمحيـن