يامزنتي هتان وصلك سقاني وانا شفاوي والزمن يبّس الريق
يعني سقيتيني وانا ما مداني ابلل اْعروق الهوى والمعاليق
ظميان وصلك والظروف اتحداني لني حملت اْمن الزمن فوق ما اطيق
وأقوم بحمولي لو اْني اعاني وأقول انا مرتاح..! وانفاسي تضيق
وأصوّر الدنيا بعيني اماني وتْموت امانيي ومن حلمي أفيق
وأصحى واجاري ما حصل في زماني وعن كشف كنوني ظلوعي مغاليق
وأكتم هواي اللي بقلبي كواني لا اطيح بعيون الرجال المطاليق
حبٍ مشقيني وشوقٍ شعاني وحلمٍ مسهرني ودمعٍ مغاريق
واعيش ما بين الرجا والتفاني وأحفي قدم ساقي بروس الشواهيق
ارقى على رجم المحبه عشاني شفقٍ على يومٍ يلّم العشاشيق
واليا انتبهت اليا مكاني مكاني ومن سجتي تزرا علي المخاليق
وأللد عيني في سهيل اليماني واعاهده واكثر معه فالمواثيق
انه ليا شافك وانا منك اعاني ينقل لك الصوره ويكشف لك الضيق
ياللي خذيتي خافقي من كياني بأقول لك هرجٍ ويحتاج تدقيق
يامزنتي لو ان وصلك سقاني مانيب ظامي والزمن يبّس الريق