(( مآنيَ بَ خآينَ ))
يا بنت هذا صاحبي و اقرب الناس
تبين اخونه بكل بساطه عشانك
و الله لو انك خلقتي من الماس
و صرتي بعين الكل شيخة زمانك
ان صاحبي يبقا مكانه على الراس
و انتي حبيبة صاحبي في مكانك
وشلون ابادلك المشاعر و الاحساس
و اسرق من ايدينه غلاك و حنانك
و انا ادري ان حبك بقلبه بلا قياس
و انتي تخونين الوفا يوم صانك
تخيّلي انك مكانه على ساس
مع اقرب انسانه غدربك وخانك
يسهر معاها طاردٍ نوم ونعاس
في منظرن لو صار زعزع كيانك
شفتي شلون ان موقفك حيل حساس
شفتي شلون انه قليل ٍ امانك
مثل الكبير اللي صغر حيل وانداس
انتي نزلتي من احترامك وهانك
لكن انا ببقى وفي لأقرب الناس
ماني بخاين في رفيقي عشانك