لابالله إلا عنـد مثلـك وشـرواك
يااللي تساوي من عددهـم ملاييـن
ياحبي اللي محجر العيـن مربـاك
والعمر كله لك ريـاض وبساتيـن
إن جار وقتك حطني صوب يمناك
وان بار وقتـي للعنـا لا ترديـن
أرضٍ مشيتيها معي باست اخطاك
وارضٍ سلكتيها لوحدك تضيعيـن
نجمك سطع والكل قـام ايتحـداك
بالمكر سنّو لـك نظـام وقوانيـن
محشومةٍ بالعـز والشـر ماجـاك
هذي ضرايـب للتفـوّق وتثميـن
أنا الصديق اللي ليا طحت يفـداك
بالروح والقلب الوفـي للمحبيـن
ماني من اللي لا اغتنى عنك خلاك
حتى لو اغروني بنات السلاطيـن
ماني خويك في السعـه وآتمنـاك
عزوتك انا في حزة العسر والليـن
خذني عصا موسى رفيقٍ لممشـاك
وافلق بها بحر القلـوب المغابيـن
شرع الهوا حكمـه تنفّـذ بفتـواك
واصدرت مرسومه بنجمه وتاجين
بالك يجي في يوم قلبـي بينسـاك
ولا اتخلا عنـك وانتـي تعانيـن
ما اقول لك ياعم فـارق ببلـواك
مثل الذي يفرح بموت المصابيـن
على خيوط السالفه طـاب معنـاك
ارجم بها العاقل تهابـك مجانيـن
أنا عمـى عيـنٍ تحـاول تجنـاك
بالحرف واسنان القنى وام حدّين
الليل لو يظلم على وقت مسـراك
ترسمني الظلما لك انوار ساريـن
يااللي تباشير السعد فـي محيـاك
ياورد ياجوري سليـل الرياحيـن