أشتاق انا لعيون غالي على شان
فيها ملامح لمحة عيون غالي
فيها ملامح لمحة عيون خلان
خلان خلوا موقع القلب خالي
يازين انا لعيونك اليوم سهران
في وصفك اللي مايفارق خيالي
لك صورةٍ فيني معي وين ما كان
أعطيتها حب وحنان ودلالي
اشوفها في ناضري بين الأعيان
واضمها بين اليمين وشمالي
وفي مجلسي اشوفها بكل الأركان
تقبل وتجلس دايمٍ في قبالي
واقول انا ياصورة الشوق ولهان
ولهان يابعد العمام وخوالي
في شوفة اللي له مضى وقت مابان
وكثر الوله عدت ثوان الليالي
يامسك ياعنبر وياعود ريحان
ياورد فل وياسمين متوالي
انت بشعاع الشمس بالنور تزدان
وانت القمر للشمس بعد الزوالي
انت أجمل الدنيا على مر الأزمان
ما كان بالماضي وما كان تالي
أجمل من اللي توج بزين لبنان
عرش الجمال ويخفي الزين شالي
انسان لا والله فلا اظنك انسان
نصفك ذهب والنصف الآخر لآلي
استغفر الله يمكن تكون مرجان
زمردٍ والماس انت احتمالي
لاوالله الا صار بالوصف نقصان
قصرت انا بالوصف واعزتالي
سبحان من سواك بالزين سبحان
سبحان ربٍ بالسموات عالي
،,{÷