نظرة حنان وثانية حنيه
الله واكبر ياعليك لثامه
ادخل اناظر صورتك يوميه
ماينقصك الا تحط الشامه
انا بلاي الصورة الرمزية
اللي بها رمشك رمى سلهامه
"مثل العسل" ماينقصك يابنيّه
الا خفوقي ترتمي قدامه
ملامحك فيها حلا حوريه
تقضي على مستقبلي واحلامه
الحب قصة تبتدي بالنية
وانا خفوقي بان فيك هيامه
تلطّفي بي ياغلاي شوية
ودي نعيش الحب باحلا ايامه
علاقة ٍ تبنى بلاسلبية
تبقى على طول الدهر واعوامه
ماتنتهي تبقى معانا حيه
قلبي معك مايسمع للــوّامه
بين الحنايا جمرةٍ مضوية
لاتتركي فكري يعيش اوهامه
بعض الغلا يذبح ترى راعيه
قالوا ترى الفرقى بعد هدامه
ادخل واشوف الصورة الرمزية
في كل يوم وحالتي منظامه
نظرة حنان وثانية حنيه
بالمنتدى بان الحلا بلثامه