اسلي خاطـري بالشعـر اسلـي واغني من هجوسي مـا حصلـي
اصون الشعر لامن جيـت اغنـي اصون القاف من هفـوة وزلـي
احسب حسـاب نـاس ٍ ينقدونـه وسمعة عالمه هـي سمعـة لـي
زرعت الشعـر واسقيتـه بيـدِّي ونبت وازهـر رياحيـن ٍ وفلـي
اقـول الشعـر وانتـم تنصفونـه والي جمهور ذوق ومخلص ٍ لـي
الي جمهور فـي شبـه الجزيـرة من الطايف اليـا ديـرة حولـي
اقـول الشعـر لجـل إتابعونـه وشعري مـن جماهيـري يحلـي
واقول الشعر في نظـرة عيونـه اقول الشعر في توصيـف خلـي
اقـول الشعـر لامنـه نظرنـي اليا منـه نظرنـي جيـت كلـي
اجي كلي قصايـد فـي قصايـد اليـا مـن الغـلا جانـي يهلـي
اليـا سلهـم بعينـه قـلـت يالله تثبتني لجل مـا اركـع واصلـي
تحكَّم بي وانا اللي شيـخ ربعـي وصرت آخذ تعاليمي مـن اللـي
تقول انه علـى سـرب الطلايـع وانا في خدمتـه جنـدي مظلـي
اقول الشعر في جيـده وخصـره واقوله في الجديـل اللـي مدلـي
واقوله كل مـا ناظـرت زولـه عسـى رب ٍ عطانيهـا يخـلـي
واقول الشعر لجل ارضي غروري مـع الشعـار منزالـي معـلـي
مكاني ( تاج راس الشعر ) عالي ملكته يـوم غيـري مضمحلـي
وانـا والله مـا بتـرك مكانـي ومن غيري قـدر ياخـذ محلـي
تبي تقرا قصايـد خـذ قصيـدي عسى كـل المعانـي فـدوة لـي