الا يا طير وش نوحك كسير ونازفٍ مجروح من اللي ناويٍ قتلك بقصد الـروح ينهيهـا
اشوفك طايحٍ بالدرب لا حـي ولا مذبـوح وجروحك وان بدت للناس تحاول انت تخفيها
الا يا طير لو جرحك يطوّل يندمـل ويـروح وانا جروحي من الايام ما يسكت مناديهـا
تعودت العذاب وكسرة الخاطر وكثر النـوح ولا عادت معي تفرق عن ايامـي لياليهـا
اقضي العمر في غربه لعل الفجر يوم يلوح وذاك الفجر ما بيّن وشمسي فـي تواليهـا
ابي هالوقت لو يرحم يخفف جوره المفضوح وينسى النفس لو ساعه افكر كيف اسليهـا
الا يا طير يا مهاجر هجرت غابتك والـدوح الا بالله تاخذنـي حيـاة الـذّل مـا ابغيهـا
ابي حريتي مثلك ما دام الجو لـك مفتـوح اذا من ضاقت الدنيا اهاجـر فـي نواحيهـا
ادور حب ما يرجي لحبي غايه ومصلـوح يحب الروح لاجل الروح ما يمكـن يعنّيهـا
يحس بها اذا تعبت ولو ما هيضـت للبـوح يدفيهـا اذا بـردت ويمنـع حـرّ صاليهـا
ويسقيها اذا ظميت حنان الحب بالمسمـوح واحس الطعم للدنيا قبل ما ارحـل واخليهـا
ترى قلبٍ بليّا حب جمادٍ ما عـرف للـروح وبدون الحب هالدنيا جحيمٍ صعب لاضيهـا