حبيبي لو قسى وقتـي علـي وشانـت ظروفـه
بحبـك لأخـر حـدود الحيـاه ولأخـر انفاسـي
على راع الهوى قالو هنـاك اوصـاف معروفـه
( مسّرح , منشغل عقله ، لاهو ذاكر ، ولا ناسي )
امنيك الشعر واجمـع بيـوت الشعـر وحروفـه
والى منـا تلاقينـا نسيـت اش قـال هوجاسـي
حبيبي والعنـا واجـد ياخـوف القلـب ياخوفـه
تغيـرك الليالـي والسنيـن وتجـرح احساسـي
احاول مقـدر اتنفـس تقـول الـروح مخطوفـه
الـى منـي تخيلتـك عنيـفٍ غاضـبٍ قـاسـي
والى منـي توقعـت الجفـا والنفـس ملهوفـه
يشب بالقلب نـارٍ مـن سناهـا ينغلـي راسـي
حبيبي لي خفـوقٍ وافـيٍ لـك حقـق اشفوفـه
يبي منك الوفـا يـوم الوفـا طبعـي ونبراسـي
عبس وجـه الزمـان وحضنـا ياقـل معروفـه
عسى لامن طرحني هالنصيـب اطيـح متواسـي
محبك فـي متاهـات المخـاوف يفـرك كفوفـه
ترى مابعثر احـلام الطفولـه غيـر وسواسـي
ولكـن المتاعـب فالهـوى ياصـاح مألـوفـه
تهب الريح .. وتهز الشجر.. مير الجبل راسـي
وانـا رجـلٍ ليامنـه حلـف يـبـر بحلـوفـه
لك احلف والـذي نفسـي بيـده يابعـد ناسـي
لحبك لو قسـى وقتـي علـي وشانـت ظروفـه
احبك لأخر حـدود الحيـاه ... ولأخـر انفاسـي