إن كان مالي في سما دنيتـك نـور
والله لشعل فـي خفوقـك حضـوري
ولحط لسمي فـي حنايـاك دستـور
اسـمٍ يعيـش بداخلـك دكتاتـوري
واكتب على صدرك دواوين وسطـور
شعـرٍ يترجملـك خفايـا شعـوري
واخلي العـوج المحاديـب جمهـور
تعشق طواريقي وتهـوى بحـوري
واسمعك صوتي على كـل مجـرور
صـوتٍ يغنـي بالقصايـد جهـوري
واعلمـك ان الشعـر عبـد مأمـور
لامن طرقته يصبح الشـور شـوري
تاقف هواجيسه من الشوق طابـور
كلـن يـقـول الــدور بالله دوري
وكانك تعرف ان الشعر وزن وبحور
بعلمك وش يفرقـه فـي سطـوري
حتى تعرف انه معي نبض وشعـور
واحساس لاطـرو مجالـك يثـوري
يامعتلي عرش البهى سيّـد الحـور
لجلك ومن شانـك ابعلـن ظهـوري
لجلك ابهديك الشعـر باقـة زهـور
خذ نرجسي القاف .. والحرف جوري
معذور لو اكتبلـك الشعـر معـذور
وشعرٍ مايكتب فيك ماهـو ضـروري
ومعذور لو قالو لي النـاس مغـرور
دامك حبيبي فأنت مصـدر غـروري
كم لي وانا في عالم الشعر مغمـور
مافيه منهو غيـر اوضـاع طـوري
الا انت اخلفت المشاعر على الفـور
من نظرتك غيـرت فينـي فتـوري
واحييت شعرٍ فـي حنايـاي مقبـور
شعرٍ به افراحـي وغايـة سـروري
شعرٍ يضوي لي بسما دنيتـك نـور
ويخلّـد بداخـل خفوقـك حضـوري