يستاهل الشعـر والطـاروق ولحونـه
يستاهل القاف يوم القـاف طاوعنـي
يستاهل الحـب والخفـاق وشجونـه
يستاهل العشق يومـه فيـه متعنـي
يستاهل امشي علـى كيفـه وقانونـه
يستاهل الحكم يامرنـي .. ويمنعنـي
كل المشاعر لرمش العيـن مرهونـه
بالرمش يقدر يبعثرنـي .. ويجمعنـي
يكفينـي ان القصايـد فيـه مجنونـه
ويكفيني لامن طريته جـات تتبعنـي
ويكفيني اني اجـر الصـوت لعيونـه
ويكفيني اني اهيجـن لـه ويسمعنـي
ياما كتبتـه شعـر للنـاس يقرونـه
وياما عطاني مـن الألهـام وابدعنـي
منه استشف القصيد وروعـة فنونـه
وماغيره احدٍ علـى الأبـداع يدفعنـي
من دونه الشعر فاقـد كـل مضمونـه
والشعر لولاه يكتب فيه .. وش يعني؟؟
انا اشهد ان القوافـي فيـه مفتونـه
وانا اشهد انه بنظـم الشعـر ولعنـي
وان كان رجعت على الطاروق ولحونه
هيهـات قـافٍ ابيـه ولا يطاوعنـي