يامل قلـبٍ شيـن حظـه يـرده
من شي في نفسه ولا هوب سالي
أعيـاه وقتـه والليالـي مهـده
وعـزاه للـي جابهتـه الليالـي
وقتٍ يحد الرجـل محـدٍ يحـده
وكم واحدٍ دارت عليـه الدوالـي
إن زان مده شان مـده و مـده
متبـدلٍ مـا بيـن مـرٍ وحالـي
قد قيل قولٍ تستحـي منـه بـده
يا سعيد ما ظني يغـرك مقالـي
اشوف نظراتك سيـوفٍ محـده
ونظرات ربعي مثل شنق الحبالي
الحر له يا سعيـد هـده وهـده
وماكرهْ دايم في علـو الجبالـي
يا خوك ومبارك ترا مـا يـرده
الا علـومٍ طيـبـاتٍ جـزالـي
اسعى خلاف امحمـلات الاشـده
واحوش رزقي فوق جرفٍ هيالي
و اليا بنيت البيت مانـي بهـده
عيبٍ طمان الرجل عقب العوالي
واغيابي لامن غبت ماهو مصده
وانته بخيصٍ بي من اول وتالـي
خاويتني اربـع سنيـنٍ مسـده
خوه وفا مـع طيبيـن الرجالـي
نمشي دروب الطيب في كل بـده
ونطرد ورا الناموس في كل جالي
خذنا المراجـل بالعلـوم المقـده
وميرادنـا وردٍ قـراحٍ زلالــي
طيب الفتى مجناه خالـه وجـده
وانا اللي غانم طيب جدي وخالي
واليوم كانك صاحبك مـا تعـده
( يا هملالي صدق يا هملالـي )
يا وجد حالي وجد شيخ المسـده
شيخٍ على خصمه فعوله وبالـي
ايذود عن ربعـه وربعـه تهـده
واعداه تظفر به وحيـدٍ وخالـي
وأصبح كسيرٍ في مرابع مضـده
والذل ذاقه عقب عـز وجلالـي
من كلمهٍ جت مـن خـويٍ اوده
من وقعها كني طعيـن السلالـي
لو جات من غيره عرفنا مـرده
ومن عادتي ادمح خطا كل غالـي