مدام ان الزمن قاسي ومدات الليالي شحاح
ترا مال للفقير الا يمد ايده لخلاقه
وانا منفضل ربي عشت في وقت العنا مرتاح
والى جار الزمن ماقمت احاتي نوض براقه
لو ان قفل الزمن ماله مع بعض العرب مفتاح
فلا ضني بتلقى واحد طعم العسل ذاقه
ولكن خلقت الدنيا كذا والرابح المنزاح
عن دروب مماشيه صعيبه تخلف الفاقه
ومدام اني على مايرام وخاطري منساح
فموضوع الزمن مافيه داعي نكشف اوراقه
ابدله عن صواديف الزمان اللي حياه رياح
وادله نفسي بشي عليه النفس سباقه
رعاك الله ياللي طال صبري لين سدي باح
وقلبي في يديك 00 بابه ومفتاحه ومغلاقه
اسوج الرجل واقدامي على درب الغلا سراح
وقلبي في غلا حضرة جنابك ماحد ا عاقه
عطيتك من بعض روحي على خبر القلوب صحاح
وبديتك على نفسي بشي يصعب اطلاقه
وفي كسرة عصا 00 تزعل وتحرق شجرة التفاح
وتكويني على الضلع القصير وتنضج احراقه
تعال وعالج جروحي وكل شي راح
تعال وجدد امالك ترى الايام سراقه
سرقت القلب واثرك معتبرها سرقة المزاح
حد ن شافه ضحك وان ماحدن شافه رفع ساقه
للشاعر 00 صالح المانعه المري 00