من ذاق حر القايله يعشق الليل=ومن شب ضوه ليلة البرد يدفا
خل ابرهه الاشرم على ذمة الفيل=وانظر لشي مايوصفه وصفا
ياذيل والله ماتجي راس ياذيل=علم ماهو يغبى ولاهوب يخفا
واللي حما بيته بطير ابابيل=ماجيتك ادور لمن راح واقفا
ولاجيتك اطلب منك بن ولا هيل=جيتك وجرح الظام غاديه يشفا
جيتك بكلمة كنها صقعة الويل=ان قلت تكفا لا تهاون بتكفا
تكفا تراها كلمةٍتقطم الحيل=لا بالله تنسف الحيل نسفا
تكفا ماهي لمعقبين الفناجيل=تكفا لصلف وعادة القرم صلفا
تكفا ترى تكفا لها هدرة السيل=في صدر حرً بنتف الطيب نتفا
تكفا ترى تكفا تسرج الخيل=ان كان لك بالخيل سرجٍ وعسفا
تكفا تبيًن كل لاش وحلحيل=تسمع لها بالصدر هبدٍ ورجفا
تكفا وتكفا ماتساق للمهابيل=تكفا تخلي القرم لاش وهطفا
تكفا ياقرم الرجال المشاكيل=حماية الساقه بسيفٍ وشلفا
تكفا ترا تكفا تهز الرجاجيل=ولولا صروف الوقت ماقلت تكفا
ماقلت تكفا غير من فترة الحيل=وانته ولد من يفعل الطيب تكفا
ماعاد بي شده ولاعاد بي حيل=ضدتني الايام والقلً تكفا
واليوم عندك يارفيق المشاكيل=العذر ماينفع وانا قول تكفا
حيثك من اهل الطيب واهل المفاعيل=يازبن من جاله ومن قال تكفا