[ذيب الزبون]

مرثية في الشيخ سعد بن دابس الزبني (السعيدي) رحمة الله عليه
لشاعر عيسى عيد خليف المهيمزي وانا باسمي واسم محبين الشيخ السعيدي اشكره جزيل الشكر وصح السانه والله يفك اسر السجين ....

قالوا علامك قلت علمي هوايل = شيخ توفى من شيوخ القبيله
شيخ عريب من كبار الحمايل = نسل الرجال اهل الوفاء والنفيله
شيخ يحوش المرجله والجمايل= يفرح به اللي شاف بالوقت ميله
شيخ كريم من كرام السبايل = من خلقته ماقيل مد القليله
شيخ يعرفونه جميع القبايل= بالطيب والحكمة وعلوم الفضيله
شيخ لاصار العلم نقض وفتايل = حلال قالاتن عسيرة ثقيلة
شيخ ملك بالطيب بيض الفعايل = ينهي لزوم اللي في بيته يجيله
شيخ لاصار العلم قاصر وطايل = تجيه صعبات المواقف ذليله
سعد ولد دابس وفي الخصايل = شيخ توفى والمراجل حصيله
يشهد له اللي يرتكي للثقايل = راعي المليحاء عز من يشتكيله
والعلم واضح مايبيله دلايل = انا اشهد انه للمساري دليله
راعي المليحاء يوم جته الرسايل = من عند مسجون تزايد غليله
محكوم قص ولا تدور البدايل = وعلى قصاصه باقي كم ليله
آخذ ثلاث ايام والدمع سايل = وجروح رجله فيه واعزتي له
وفكر وقدر في جميع الوسايل = يبغى عميل مايبور بعميله
وفكر يروح لواحد يم حايل = شيخ مشى كل الدروب الجليله
ووجه لابو نايف عريب السلايل = وشرح له الموضوع قصه هويله
وقام وجمع له من صناديد وايل = وجاهم على حسب السلوم الاصيله
ووجه على جدة وكله صمايل = يطلب له التمديد مدة طويلة
وجاه الاجل يومه وشد الرحايل = وحنا انزعجنا يوم ذاعو رحيله
لاشك الانسان بالارض زايل = الدايم المعبود منشي المخيله
ابطلب المعبود منشي المخايل = اللي من الكفار نجا خليله
يغفر ذنوبه في نهار الهوايل = ويعوض روحه في جنان ظليله

الموضوع الأصلي: قالـوا علامـك قلـت علمي هوايل ..؟؟ | | الكاتب: ذيب الزبون | | المصدر: شبكة بني عبس