الما .. ركد .. والجريد الغض ماهزه=نسايم والزمن .. لا جا .. ولا راحي
جمحت .. يامهر .. حظي وأثر بك .. فزه=ماطولت كلها غاره ومرواحي
لو كنت رمح بكفي كان باهزه=لاشك (من هو عليه أهوش بسلاحي؟)
ياسيد الناس شمسك مالها حزه=تعبت أماري بشمعي .. وضي مصباحي
ياسيد الناس كل لابس بزه=صعب نفرق مابين (الخبل والصاحي)
كم (واحد) مر .. وقال (عيوني تخزه)=هو .. مادرا .. (أني عمى .. عن قاصر أشباحي)
أنا عيوني تتل .. النجم وتكزه=عن حارك الفلك .. هذي عادة رماحي
ومالوم .. حظي .. تعب .. من كثر ماأدزه=لو هو لغيري نساه الهم وأرتاحي
بدر بن عبدالمحسن