يا قارئة لا تقرئي الفنجان=فنجاني أعرف منتهى اسراره
قالت: تمهّل لا تكن عجلان=وْفنجانك إسمع تالي اصداره
وْيوم إقلبت فنجاني المليان=من البلاوي قالت: الجارة
من عذّبتك وْخلّتك حيران=وأصبحت وسط الحزن وأسواره
تارة تضيق من أقرب العربان=وْتشفق على من عذّبك تارة
وْحلّ القهر والهمّ والأشجان=والضيقة اللي تسعد الحارة
يستبشرون بهمّك السكّان=وكلٍ يسوي افراح في داره
وْخصوصاً الأقراب والصدقان=كلٍ لجل موتك شعل ناره
يا قارئة ما صار صار وْكان=واللي جرى من الوقت واقداره
هل فيه شيّ الأن وقته حان؟=قالت:من اللي صار محتارة
ستة نساء جمّعهن الشيطان=ما فيهن اللي تحمل بْشارة
ما يحملنّ إلاّ هموم إنسان=مكّارةٍ ترضخ لمكّارة
هذا لأنّك شاعر وْلك شان=وْلأنّ مهنتك أصبحت شارة
وْقصايدك تزرع بهم شنآن=وكلٍ لغزوك شنّ له غارة
يا قارئة ما صار صار وْكان=واللي جرى من الوقت واقداره
هل فيه شيّ الأن وقته حان؟=قالت:من اللي صار محتارة
قلبك وأخذته منك غصن البان=وْراحت وراح العمر وأزهاره
وْصارت حكاية مالها عنوان=وإستأصلتها سْنين دوّارة
وْضاعت وضاع المغرم الولهان=وْلا دلّهتْه أسماء ولا سارة
والليل وبحور الشعر والجان=والعقل والتفكير وإصراره
ينادمونك طيلة الأزمان=من خلف سور الجرح وجداره
عشقك لعبقرْك أوجد التحنان=حتى أسفرت عنّه كم زيارة
مارد يحكمه خاتم سليمان=وْشاعر قصيده يسبر أغواره
يدخل بغبّاته بلا إستئذان=ويظفر بداناته ومحّاره
يا قارئة ما صار صار وْكان=واللي جرى من الوقت واقداره
هل فيه شيّ الأن وقته حان؟=قالت:من اللي صار محتارة
من يوم ما نجّمت حتى الأن=ما شفت بالعالم وبأمصاره
ما شفت مثل احزانك أيّ احزان=وْلا مثل هالفنجان وأضراره
يا قارئة ما صار صار وْكان=واللي جرى من الوقت واقداره
هل فيه شيّ الأن وقته حان؟=ودّك تقولينه ومحتارة
قالت: خلاص وْماذكر من شان=تحذر من الوقت وْمن امراره
يا قارئة مابه جديدٍ بان=جميع ما قلتي اعرف اخباره
ما قلتلك لا تقرئي الفنجان=تراي عارف منتهى اسراره
عبدالله عوجان