قالوا تحبه قلت انا فيه مفتون=وشلون مااحبه وانا ميت فيه
قالوا جميل وقلت لوكان تدرون=من هامته يالين حتى مواطيه
قالوا شبيهه قلت مافيه بالكون=ياغير بدر عشر واربع لياليه
قالوا جديله قلت كالليل بسكون=اسود ولابه نور بدر يضويه
قالوا جبينه قلت براق المزون=باول حلول الوسم والبدو تتنيه
قالوا عيونه قلت لاسلهم طعون=رمح رماه اللي موثق مراميه
قالوا شفاته قلت تكفون تكفون=خط حمر لاعاد احد يعديه
قالوا غلاه وقلت بالقلب مدفون=يفز قلبي يوم يسمع بطاريه
قالوا طرالك قلت وان كان توحون=بعده دهر قلبي وذكراه تحييه
قالوا ذبحك وقلت بالهون بالهون=يازين ذبح اللي من الناس تغليه
قالوا نزية وقلت دين ومصيون=ماداج بالحله وكثرت خطاويه
قالوا جفاك وقلت ماخيب ضنون=طبع الوفاء طبعه وقمة مباديه
قالوا تسمع قلت مهما تقولون=كفوا وعفوا بايع الناس واشريه