[المر العذب]

من جديد الزعيم

الله يجازيك يا(محمد عرابي)=وشلون نبهت قلبي عن غيابه
ليتك تركته تسج به المرابي=يحلم بها لين يبرا من صوابه
ماقلت لك بالطريق احسب حسابي=مادام أنا وأنت بالهم نتشابه
الدرب موحش مثل (ريش الغرابي)=والعمر محني مثل قوس (الربابه)
ليا خبطنا على بيض المخابي=تخاشرتنا مشاريه ومهابه
حسادنا : لا متون ولا علابي=وأحبابنا : لا صدور ولا قرابه
لولا رجانا بعلام الغيابي=تناهبتنا ليالينا نهابه
بصدورنا كل حلم (عذب) رابي=وماجابه الوقت يا (محمد) غدابه
صالح زمانك على شح الزهابي=لو ماتوقع على خشمه ذبابه
وقله : بلاشي نكد يابو الشبابي=يابو الشبابي ترى ماهي طلابه
مايروي الكبد ضحضاح السرابي=نشد لنا عن رفيف وعن سحابه
وأرقى بنا كل عسر وكل نابي=وأجزع بنا كل خبت وكل غابه
أما عوينا مثل جوع الذيابي=وإلا خذينا العشا .. مثل الذيابه

الموضوع الأصلي: مساعد الرشيدي : لا متون .. ولا .. علابي .. | | الكاتب: المر العذب | | المصدر: شبكة بني عبس