السلام عليكم ورحمة الله وبركاته ..
اطلت الغياب فلم اجد من شي قد يشفع لي بغيابي سوى هذه الابيات
واعتذر ان كانت لاتليق بمستوى ذائقتكم الرفيعه
الا انها محاوله فقط لا اكثر
فأتمنى ان تجد قبولا ً في اذهانكم وقلوبكم ..
يضيق وجه الحلم لاقبل نهاري =واودع طيوفك ب ااه وتناهيد
وشلون انام وداخل العقل طاري =يرسم على وجه السعاده تجاعيد
حبيبتي نجمه عليها مساري =من نورها غنت بها جرهد البيد
اليا اقبلت صافح خطاي انتصاري =وعيونها ترسم بصدري زغاريد
بيمينها ذابت ملامح يساري =واطلقت فيها اسراب شعر واناشيد
طفله وفي يدها غصون انكساري =وكم بعثرتني للأرق والتساهيد
عنيدة ٍ منها تغار الحواري =والوقت يفرض قيد ونقاوم القيد
للبعد والفرقا لحون مواري =وماترجع اللي راح شرهه ومناقيد
اخذت منك موعد ٍ شب ناري =قبل الفراق وسال بالــحلم تشـــريد
وغناك بالموعد حنين انتظاري !!=وانتي بعنادك ماحشمتي المواعيد
الوبل مابلل رياق الصحاري = ليتك رويتي في ضلوعي عناقيد
اخر فصول الحب موت وعباري !=واول فصول الحب ضحك وزغاريد
وسلامتكم