لا متى نخفي المشاعر يالهنوف
القلوب سنين تنبض بالوله
نرمي حمول المحبه للظروف
والظروف أبواب وقتٍ مقفله
طال آسر شمسنا قيد الكسوف
الدهر خلّا الموارد مُقحله
الجفاف اللي براضينا نشوف
طالت سنينه علينا ممحله
آن ترتيب النقط فوق الحروف
نبتدي فيه الغرام من أوله
أقبلي يمي ومديلي الكفوف
دامني مقبل تعالي مقبله
نغتنم فرصة لقانا لا تطوف
فاصل اللي فات حان نوصله
نتواصل يالغلا من دون خوف
نرسم آمال الهوا ومستقبله
ونتعاهد ما تفرقنا ظروف
ولهوانا كل صعب نذلله