لا ملامه لا تشره لا عتاب=ماغدى لك شي مفروض يغدي
لا تحاسبني على اسباب الغياب=في يدك ماصار ماكان بـيدي
لو رجعنا وابتدينا بالحساب=منتهي وياك من قبل ابتدي
لك انا ماجيت من باب الاعجاب=جيت احبك .. وافد لك قلبي فدي
كنت اشوفك غير لين القلب ذاب=في هواك وصار ماهو بـجسدي
وقتها لو لي ولد عمره شباب=يمكن احبك كثر حب ولدي
لكن اللي غاب .. يوم النور غاب=شي يحداني عن ايدينك حدي
تذكر اللي صار يا مال الذهاب=ليلةٍ ماجيت وامسيت اوحدي
لا تغرك بسمتي وزين الثياب=داخلي ضايق من الوقت الردي
السؤال اللي بقى ماله جواب=ياكثر مامر على الجرح الندي
يا معودني على طرد السراب=وشتبي فيني اليا ضاع جهدي ؟
صرت انا وياك نشبه للسحاب=لا تجمعنا تساقطنا بردي
السحاب اليا تساقط بالاهضاب=يحيي القاع الحزين الجرهدي
بس حنا .. لا تساقطنا عذاب =نكسر القلب الكبير الاجودي
ثامر شبيب