البداوه محبتها تنامت بروحي
ثبّتت في صميم القلب وسمٍ قديم
أتبع البرق لا خِلتَه بنَوّه يلوحي
أعشقه مثل ما يعشق نديمٍ نديم
حس خبط المطر بالقاع يبري جروحي
في زبارٍ خضاره ينعش المستهيم
زاهره في فياضٍ من مطرها تفوحي
ماطرٍ يدني المبعد وعطره مديم
ما حلا البدو لا شدوا خلاف السروحي
بين وقت وربيع وبين صحوٍ وغيم
كنزهم بالقناعه والسوالف مزوحي
في رْباع الكرامه والمقام الكريم
زِين شوفة ظعنهم مقبلينٍ نزوحي
للهجال العذيه بينهم طفل ريم
من هدب ناظره يومي بسيفٍ ذبوحي
صابني به زمان اول وقفّى سليم
ناويٍ بالشديد بْعيد مدري شحوحي
جعل دربه سلامات العنود العديم
بين ذيك الخباري عنده تْحوم روحي
حيث عشق البداوه بالمحاني قديم
...................؟؟؟؟؟؟؟؟؟؟؟؟؟@