(وحمس قلبي حمس بـن بمحمـاس)
حمسة شكيل بالكرم لـه حماسـي !!
من هل الوفا والطيب والعز نومـاس
وبالمجلس اللي ماوطى فيه خاسـي !!
على الذي ياحمود من بـد الاجنـاس
غرو ٍ سلب عقلي بوقـت قياسـي !!
تقول حادينـي علـى قـب الافـراس
طلاب ثار وحقـه اليـوم راسـي !!
حتى اعتزلني واختلابي عـن النـاس
راع العيون اللي هدبهـن نعاسـي!!
ارموش عينه كنها سهـوم واقـواس
وانا اشهد ان الرمش له سهم قاسـي
وعنق ٍ طويل وزاهي العـود ميـاس
بالوصف خشف الريم بين الطعاسـي
قلت ارحمي من حاسه الوقت واحتاس
عايش وحيـد بيـن ربعـي وناسـي
يخاف لايعشقـك ياعـذب الانفـاس
ويشوف من وقتـه همـوم وماسـي
ويخاف غدر كليب من رمح جسـاس
ويهتز لك ماكان فـي الأرض راسـي
وتصير حـرب مالهـا حـد وقيـاس
ولا الحرب حرب لي ولا الطاس طاسي
ومن الهوى ذقت المرارة والأتعـاس
ولا المر حاليلـي ولا الكـاس كاسـي
لدت وقالت شكلـك انسـان حسـاس
قلت الحذر واجـب وشـي اساسـي
العشق مزن الـه العواذيـل عسـاس
وانـا بلايـه مـن كثيـر العساسـي
وفي لحظة ضاعت مع الخلق والنـاس
في زحمة الاسـواق وكثـر التكاسـي
اقفت وانا اضرب منها اخماس بخماس
اغني على فرقـاه خمـس الحواسـي