سلامي سلم اسلام بالطيب مدهـون اقولهـا يـوم الرحـى مستـديـره
دام الوفا ويـاك بالطيـب مقـرون الاولـه تتبـع طريـق الاخـيـره
هاض الفكر واليوم وافي ومضمـون واغوص انا واسبح بحور(ن) غزيره
امشي مع القيفان ممشن على الهون ماضاق صدري والمعانـي عسيـره
اجـر قافـي والقوافـي يـجـرون مثل الخطام اللـي يسـوق بعيـره
يامكثـر اللـي للقوافـي يصفـون تصفيف قافه شبه خربـن كسيـره
يابو سعد والنـاس عنـي يعرفـون رجال ماجاه الـردى فـي ضميـره
بعض العرب مابين صاحي ومجنون حنـا نـدور للوجـيـه الستـيـره
النـاس بالامثـال دايـم يقـولـون الرجل مـا يقـدر يحـدد مصيـره
من يخلط التفـاح منجـا وليمـون عقب هذاك اللي شرب من عصيـره
ومن عاشر العقرب وطبعه ترا يخون يلدغ ولا يـدري ومنهـو خشيـره
ياذيب انا ويـاك والنـاس يـدرون صعب العشير يخون صحبة عشيـره
هلا القنص مع طلعة النور يمشـون كل(ن) يعرف الدرب كلـن خبيـره
ماني صحيب اهل النمايم يحشـون اللي تجر الصوت فـي كـل ديـره
وماني من اللي مع هل الليل يسرون امشي على وضح النقـا والسفيـره
العاقل اللي يسمع الهرج مضمـون ياخذ قليـل الهـرج يتـرك كثيـره
انا بنيت القاف فـي بيـت مركـون مثل الجمل لاهـاج يسمـع هديـره
وصلاة ربـي عـد ماكـان مكنـون على نبـي الحـق نـور الجزيـره