قبل حد السعودية بحد الكويت = تاهت الرجل في درب المولع وتاه
في طريق الغرام اللي بنى ما نويت = أهدمه لين ضيعني وضيع غلاه
قلت يا رجل سيري وأضربي ما بغيت = واتركي من نوى الفرقا يذع ذع هواه
إن طلبتي وجدتي وان نويتي عطيت = كل درب ٍ تبينه عارف ٍ منتهاه
قلت ناسك كثار وكل بيت ٍ بيت = وقلت يا قلب في عيني كثير أشبهاه
مالنا بالمقفي رحت وألا لفيت = والمقفي مقفي يا لعل وعساه
يغتني في طريقه دام عنه اغتنيت = ويهتني في حياته بمن يحب وهواه
كم من حي يحسب له وهو حي ميت = وكم من ميت يحسب له حساب الحياه
عزة النفس تأخذني زعلت ورضيت = عزتي بالزعل وألا بعد في رضاه
وأشهداني عنه مديت ثم انتحيت = مثل مدة مقيط اللي لحق به أرشاه
شلت من ذاكرة راسي صوره وسليت = ما بقالي بقـالي وما عطانـي خذاه
بس أودعك يا من هو سكن بالكويت = لا لقاء إلا وداع ٍ واصل ٍ منتهــاه