حي الخطاب وحي من جاب الاخبار
يامرحبن عدة احساب النجومي
واعداد من طافو على البيت زوار
يرجون غفران الكريم الرحومي
مكبرين وجوه من كل الاقطار
يسبحون وطالعات الكمومي
يالصاحب اللي ذايقين مر الامرار
بسباب حب مرودعات الوشومي
ابدا غريباتن على القلب تذكار
هواجسن وردن عليه اهجومي
يوم الهوى والحب ياوافي الاشبار
واليوم عندي مابقتله رسومي
ان كان عندك يبيض الوجه مشوار
خلك على الطرقه حصانن عزومي
ممشى النقى لو هو على صالي الحار
مايلحقك من نيت الخلق لومي
لو كل من طب المحيطات ماحار
ولا كل كواين يصيد الوهومي
طرد الهوى سوقن تهاواه تجار
احدن كسب واحدن يروح محرومي
من عصر نوح وعصر سكانت الغار
والوقت بين العشاشيق محكومي
راع الهوى والحب عرضه للاخطار
ولا يلام لو انه يطش الهدومي
ولو عرضه للبيع في غال الاسعار
وتسومها من عرض ناسن تسومي
ولا عزمت اصبر ترى الوقت دوار
ولابد من ربك يحل الهمومي