يازمان الوصل وصلنـي معـاك
لااجمـل ايامـي امانـه ودنـي
خطوتي ماهي على ممشى خطاك
وكل شيٍ فـي زمانـي صدنـي
كل ماهبت نسايـم مـن بهـاك
ثارت شجونـي وقالـت هدنـي
ويو م ترقابي لعالـي مستـواك
مانزلـت بحاضـرٍ ماشـدنـي
تزعل ايامـي ويكفيهـا رضـاك
كيف تحسبهـا وكيـف تعدنـي
وياحبيب العمر قلـي وش وراك
لاتقـول الوقـت ظرفـه حدنـي
الوعد قـدام لـو يلحـق مـداك
في العيون السود تكفـى هدنـي
لاتعدانـي ولاتقـطـع رجــاك
دون كـل النـاس مـره بدنـي
التفت بالله شـف منهـو هنـاك
قبـل تجفانـي ياليـت تردنـي
ان كتبتك حرف فكري ماقـراك
والخيـال اللـي بنيتـه هدنـي
ولو بلشت بحظي الاقشر معـاك
ولو عظيم اليـاس قـام يكدنـي
اتحـرى وانتظـر حـزة لقـاك
والقليـل مـن القليـل يسدنـي
مامعي غيرك ولاباقـي سـواك
انـت وصلنـي وانـا باردنـي