امطريني مشاعر وانبت اغصان شوق
واغزري عذب حبِّك لجل منِك ارتوي
واحصدي من محبِك كل ماهو يلوق
في سموّك وطيبك يالجمال الغوي
جنـّه الحب فيني ممحله.. والخفوق
دوم تواق غيثِك دوم لِك مهتوي
انتي قلب الحياة .. ونبض كل العروق
وانتي من بعد ديني .. همّي الدنيوي
بهجه السعد تلمع .. في خدودِك بروق
والبراءة تزيّن طبعِك الانثوي
مالكه في وصوفِك .. ذوق يتلوة ذوق
التفرّد نصيّبِك .. بالحلا المحتوي
لو مسكتين ثومه .. بانت اقوى الفروق
يغدي الثوم بيدِك .. هيل..عشق ابدوي
وان مشيتي حديقه .. وردها لِك يفوّق
عبد شمس الحديقه .. ينحرف لِك هوي
لن بينه وشمسه .. سحب .. يمنعه فوق
ويحسب الشمس خدِّك يوم يضوي ضوي
والعذارى تقهقر .. لن مابه حقوق
كل شي فيِك حصري .. غصب عنهن طوي
يا هوآي المفضـّل .. يا طلوع الشروق
المشاعر كثيفه .. والتدفق قوي
برمجيات عقلي .. لا ذكرتِك تروق
كنـِّك الكيف عندي .. في زمن فوضوي
سقت فن القوافي .. لجل عينيِك سوق
قلتها من ضميري .. بالغلا تحتوي
واقبليها هديّه من محب(ن) صدوق
واسمحي كان ماهي صنفها نخبوي