[عثمان البراك]

بسم الله الرحمن الرحيم

أتشرف في الحقيقة أن أكون من شعراء هذا المنتدى العملاق وأسأل الله سبحانه أن يوفق الجميع في دنياهم وآخرتهم

لا مالت الشمس وتعدت للزوال وللغروب = قمت آتذكر فالزمان وفالليالي وش جرى
كنت أحسب ان العاشق اللي يعشق الجادل كذوب = حتى طرالي في حياتي شي ماعمره طرى
الله يسترمن عواقيب المسافة والدروب = والله يستر لا تعلقت بمشايخ وومرا
وجهت صوبك واكثر العالم مع الأحباب صوب = كل يميز دربه وكل على همه سرى
ألا الضميراللي يحسب انه مع الناس محسوب = أفقر من الذرة وفجأة طاح باموال الثرى
عمري وانا ما صدّق آشوف النعومة والعذوب = حتى ولا شفت النعومة فالمناطق والقرى
يازهرة الأيام لو تدرين باوهام القلوب = أوهامي اللي بالخيال ونوب باحلام الكرى
السكر امع الماء يذوب وقلبي بشوفك يذوب =ما كنّ أشوف ألا انت مابين الثريا والثرى
تستعذب النظرات نوب وتكتم النظرات نوب = كنك ترى اني أراك ونوب ماكنّك ترى
ان كان في عشق المودة والغلا بعض العيوب = أشهد شهادة كلبونا فالمعاييب خشرا
سولف تواضع لي وعطني من غلا الأحباب كوب = بريت جروح العالمين ونص جرحي ما برى
ودي أعيش بفي رمشك لا رياح ولا هبوب = اعيونك الثنتين ما شا الله ورموشك ذرى
قولة جرير اللي حكم للعالمين وللشعوب = مايذبح ألا نظرة عيون الغضيض الأحورا
واحترت مدري وش ورى سر الحوادث والغيوب = أما آتقدم خطوة الـــ قدّام ولاّ ارجع ورى
اتصدقين اني على الأمرين فالحال مغلوب = وانّ الفؤاد اللي يحبك مات حبّ ولا درى
توّي عرفت المغرم اللي بالهوى ماهو كذوب = وتوي فهمت اللي حصل للعاشقين ووش جرى