يا بحر ما عرفك ولا اعرف خوافيك --- لاشك حدتني عليك اليالي
يحدني حادي واروح لشواطيك --- والله يعلم لا وصلتك بحالي
لاضاق صدري يا بحر جيت ناصيك --- وانا بدوي لاضاق يرقا الجبالي
يرقا على المشراف ماهو حواليك --- ويجر صوته فالفضا ما يبالي
يا بحر قالو فيك واقول وش فيك --- جنوبك يشابه لماك الشمالي
ما تعجب الساري وصعبه مساريك --- ولاحصل العطشان فيك الزلالي
والمزنه اللي برقها له شرابيك --- ما غيرت لونك بخضر الزوالي
يا بحر قل المعرفه ما ينحيك --- غريب لا كنك رفيقن موالي
ويا بحر اجيك وليه يا بحر ماجيك --- لو اني اسال ما تجاوب سؤالي
اسالك يا غالي عن اللي مغليك ---- واصبحت غالي يوم يهواك غالي