يا بعد كل الرسايل هالرسله
توّها ما كمّلت عمر الطفوله
طفلةّ فيها العطر يا طول باله
ودّه يفوح.. ويبوح، وهي خجوله
مثل طبع اللي كتبها من دلاله..
في مسافات الزمن واربع فصول
دالهٍ لا جيت أشوفه.. شاف حاله!
ما تهيّا منه لو نظره عجوله
صار عندي راس مال.. وراس مال:
ضحكةٍ معها عقل.. بس مهبوله!
لا ضحك في مسمعي كنّي قباله
كنّي اقطف ورده وعقده ولوله
واحبس بعيني خيالٍ من جماله
وارفع لسمعي يدي كنّي ب اطوله
وارسم لزوله شكل يشبه خياله..
في خيالي.. والاّ انا ما شفت زوله!
كلّما حرّمته.. ألقاني حلاله
وكلّما عنه أبتعد.. قرّبت أنوله
كنت أفكّر مرّه.. القى لي بداله
دام وصله صعب.. والأصعب وصوله
قلت: ياالله نفترق.. كلٍ وفاله
قال:ياالله.قلت لحظه!من يقوله؟!
أطري الفرقا وانا من صماله
وادري ان فرقاه ماهي بالسهوله
كم عذولٍ قد عذلني في وصاله
ومن عذلني قلت له نفس المقوله:
ما يخلّي حالة الرجّال حاله..
غير بنتٍ في مواقفها رجوله!!
....................؟؟؟؟؟؟؟؟؟@