ياهيه لو صـدوا جميـع العـذارا
يكفي ولو مـره بعينـك تلديـن
سميتهـم قـدام عينـك فـقـارا
واشوفهم في عين شعري مساكين
عادي اذا هم من جمالـك غيـارا
اشوف وحده بس ما شوف ثنتين
حاولت اداري بس مـا ينتـدارا
احساس قلبي دوم بعيوني يبيـن
من قال من قلبي غرامـك تـوارا
اقـول خليهـم بالأقـوال لاهيـن
وخليني ارسم صورتـك باقتـدارا
في بيت يبقى للقصايـد عناويـن
واحط رمشي حول رسمك اطـارا
واغمض عيوني واشوفك ملايين
اسيره انتـي والمشاعـر تمـارا
والناس ماتدري غيابك على وين
وان طاب لك بالعين حسن الجوارا
ياسعدني باللي سكن داخل العيـن
وان ضاقت عيوني بقلبي مـدارا
لو ضاق هذا الكون ماضاق تدرين
نامي وحسـادك بهمـك سهـارا
هنا مكان الزين يا قمـة الزيـن