12-11-2009, 03:08 PM
|
|
صروف الوقت
ألا يا صروف الوقت ما شفته ايكفّي
عذابي وهمّن باري الحال ويلوفه
ومن حرّ ما اونس ويش اباقول وآخفّي
ولو كان غيري زاغ عقله من اظروفه
أنا منوّل احسب كلّ من رحّب يحفّي
نصوحن وثْر بعض المخاليق معروفه
بخبث النوايا طبعها اتدّور وتلفّي
عسى اسنينهم من طولة العمر مقصوفه
وانا من مجادلهم ترى طايبن شفّي
ومثلي بشر هالجيل تستغرب اشفوفه
يقولون حملك زاد وانته كذا مقفّي
ولو كان ما تنفع ولا هيب مكلوفه
ثقال الحمول آشيلها بعزم وتخفّي
ويفرج لي اللي غفوة النوم متحوفه
وانا خابرن هرج القفى مهو بمنكفّي
تنابح كلابن من وفى الكلب محروفه
ولو يبهتوني بشّر اللي يحذّف في
فلوعي حسانيهم وسيّات محذوفه
مقامي رفيعن غصْب لو حاولو دفّي
عبيد الريال اللي للاكرام عاصوفه
هدفها اللذي لمّت وعاداتها اتسفّي
من الجحد نسيان السخي قبل معروفه
وإلى من لقيت اللي معي دايم ايوفّي
وإلى من نخيته ما يلقّي لي اكتوفه
هاذاك اكسبه وامدّله بالوفى كفّي
ولا هي اتعوق اطوال الاميال عن شوفه
وانا اليوم في بخص العرب يانعن ضفّي
سبب تجربه والتجربه دوم محفوفه
بدمع العيون وضيقة الصدر بتطفّي
قناديل قلبن مسكنه حدْر مهدوفه
حنايا الضلوع اللي بها السدّ متوفّي
بقبر الصبر وإليا بِعث جرّ معزوفه
تعيش ابدموع اللي من اسبابها ايحفّي
مذانب عيونه جزعتن فيّ واحسوفه
ولو ضاقت الدنيا عن الهافي آعفّي
ولجل الكرامه حالفن حلف ما حوفه
أنا راضي المكتوب بيّن ومتخفّي
غيوب الصدوف ابمرّها اتصير مكشوفه
وإذا كانها عيّت عن وقوفها ابصفّي
عسى الله يعوّضني بدل صبري امروفه
محمد الشلوي - عاشق الصمت
|