16- الشاعر : الرئيس
الله يسامـح نظـرةً مـن عيونـك
خلت بقلبي لـك شخابيـط وخطـوط
نظره ومعهـا دمعـةً مـن جفونـك
سالت على خداً به الكحل مخلـوط
ومن نظرتك من حشمتك من جنونـك
درستني بالحـب وأعطيتنـي نـوط
ومن شاف حالي قال يا الله عونـك
ويشك في وضعي وأنا إنسان مضبوط
ما يدري إني دائمـاً مـع شجونـك
ودائم مع الهوجـاس والهـم مضغوط
وطيفك يبكينـي بضحكـة سنونـك
لا مر طيفك صار للشعـر صاعـوط
وان كنت أنا شاعر ترى من فنونـك
زينك بشعري له مواثيـق وشـروط
( نقش الغرام) أصبح بقايا طعونـك
يكبر مـع الأيـام بالعمـر محطوط
وحلمي أعيش العمر داخل غصونـك
واقطف ثمار الغصن من جـال ناقـوط
وهدي لك ازهار لها نفـس لونـك
واعطيك ماتطلب هديه ومصفـوط
لكـن ؟ فمـان الله ربـي يصونـك
حلمي تحول من سعاده إلـى قنـوط
فرحت حياتي ماتت !. العـام دونـك
حاولت فيها وانتهت .. وأنتها الشوط
واليوم شأني غير عن وضع شؤونك
وهذا قدر في عالم الغيـب مخطـوط
ومادمت أنت بخيـر.. لا يضايقونـك
أعرف تراني لـو تنحيـت مبسـوط
ومن عاشرك في ذمتي مـا يخونـك
الله يهني واحداً فيك مربـوط
17- الشاعر : الشبح
فنجال دله يطرب الـراس والكيـف
محموس حمسة فن ماهـو غشامـه
دله مـع بـراد لـو كنـت بجنيـف
هـذي علـوم المرجلـه والنشامـه
لكن راح الوقت هـاذاك يـا سيـف
حطوه بعض الناس وسـط القمامـه
وراحت مع الي فيه لفـه وتحريـف
وقت(ن)غريب(ن) ماعرفنـا نظامـه
ما عاد نعرف جملة الحق والزيـف
أخوان عند الـي يضـارب كلامـه
العولمه صارت بروس المشاريـف
صارت على ماقيل كنـق الزعامـه
صحيـح مبداهـا خرافـه وتأليـف
مير العرب تعرض عليه انظمامه ..؟
أهدافهـا قتـل العـرب بالتخاريـف
والواقـع انـه نـدعـي بالفهـامـه
حتى الشباب اليوم صارت ملاقيـف
ماتحتـرم شايـب عليـه احترامـه
والمشكله حتى البنـات الغطاريـف
أتبـدل البرقـع بلبـس الفخـامـه
عري وفسوق وشي بالكون ماشيـف
العيب هـذا الوقـت بـان انعدامـه
الحكم حكـم الله والشـرع بالسيـف
أصحو بلاش المشي مثـل النعامـه
18- الشاعر : شاعر الوطن
مشكور يا ساكت عن الحق مشكور
خليت لاهل الكفر دولـة فلسطيـن
تسرح وتمرح مقبره مالهـا سـور
تصلخ وتذبـح بالنسـا والوراعيـن
دم العرب هذا الزمن صار مهـدور
أرخص بواجد من حيـاة أم قرنيـن
كل(ن) يناظر صم وبكـم ومعـذور
مـدام حـب المـال دم الشراييـن
ما هي غريبه عنتره روعـه ثـور
المشكلـه روع (ثنينـه وعشريـن)
(أولمرت) واثق ماهو كاذب ومغرور
روس العرب بيديه حبحب بسكيـن
أبذكر التاريـخ مـن وعـد بلفـور
مليون واحد كيف يهزم ملاييـن ؟؟
عار العرب يا ناس في عام مشهور
ألف وتسع ميـة وسبعـه وستيـن
وصار التنافس بيننا شـي مذكـور
الجار ماهو جار من عـام تسعيـن
وان كان تبغى العله الـي لهـا دور
نمشي ورى الغربي سوات المجانين
ولي يخلينا بـلا احسـاس وشعـور
بعض العرب ما طبق الشرع بالدين
ومشكور يا ساكت عن الحق مشكور
بكره تبـا تسمـع بـدم المصليـن
19- الشاعر : نادر بن مساعد
الحافـظ الله يابـلاد الحرمـيـن
وعيون من يسهر لك بكل نايـف
اللي على امنك يسهر الليل ليلين
ولصالحك مايعتـرف بالطوايـف
لادرهمن شهب الضباع المساكين
ستلهن مثـل الحـرار النوايـف
يعطيهن المخلاب بالخشم والعيـن
ويردهن مثـل النعـاج الولايـف
زبن المجنا هو خـلال المعاديـن
جاسر على الفنجال لا صار كايف
ماجات له منحه ولا جات له دين
ولاجاته له كذبه ولاهي طرايـف
من ورث ابوه موثق الحكم بالدين
ومنهج خوانه نادرين الوصايـف
نبقا لهم دايم على العهـد باقيـن
عهد الجدود ولانقضنا الصحايـف
حنا لهم فالسلـم مثـل البساتيـن
واهم لنا مثـل الغيـوم الردايـف
وفالحرب يمناهم تـدك المياديـن
وحنالهم مثل السيوف الرهايـف
انا اشهد ان الدار عند المواميـن
اخوان نوره ماهو العلـم زايـف
وانا اشهد ان العود عقب سلاطين
عبدالله وسلطان والحـر نايـف
20- الشاعر : محمد بن عبدالله الرشيدي ( غيم )
ليلً كساك البشـت والغيـم ضمـك -- حياك مـن غرتـك لاحـد ماطـاك
هـلا هلابـك كـل مابـي يخمـك -- يقول انا اولى من هذاك وهـذولاك
لا رزم سحابـك للحنايـا يضـمـك --واليا ارتعش جلدك من الخوف هداك
عاضك حنان ابـوك ومدلـل امـك --اللي اليا غطرف لك النـوم غطـاك
زايد عن امـك كل شئً يهمـك --جوده وفيضه لانشف ريقك اسقـاك
ونود الصبـا لا هـب يمـك يشمـك -- والغيم يحجب كل شمـس تحـداك
ارفع يدينك شـوف لافـوح كمـك -- مـره يجيـك ومرتيـن ايتـعـداك
خلك وفي واسق الوفاء نبض دمـك -- دام الوفي جالـك صديـقً بدنيـاك
حافظ عليـه وخلده في مهـمك -- لا تعمـسك بعض الطواري وتنحاك
ولوغرك الشيطان وابليـس زمـك-- اقول لابـو عقبهـا مـن ترجـاك
21- الشاعر : محمد الراشد
صحيح احبك من زمـان الطفولـه
يوم الشقا عن قرب الاطفال تايـب
حتى المحبـة يـوم جتنـا خجولـه
مستغربة؟ طفلين صـاروا حبابـب
نضحك نسولف كل خافـي نقولـه
والحب مخفينـه ..نخـاف القرايـب
رعيـان نفـرح بالربيـع بْحلولـه
لاقفى الدهر من جيّة الوسم هايـب
نفرح بساعات المطـر فـي هطولـه
وانضيق اذا مافـي سمانـا سحايـب
وكان الفراق الليل لاعلن وصولـه
ويروح ليلي بـس افكـر بغايـب
والصبح كـل" كيـد ولـم ذلولـه
وكل" على الثاني من الشوق ذايـب
احيانا اركـب والذلـول معقولـه
عجلان ..ماظنه عشـان الركايـب
مع الفرح مـرت سنينـي عجولـه
وكل" مشى في درب مثل الذهايـب
لاصوت لاصورة ولاشفـت زولـه
مدفون حي بدون قبـر ونصايـب
والعنك ياشـي" يجـي بالسهولـه
مصيـرك تواجـه وراه الصعايـب
شفني؟ربحت الكاس قبـل البطولـه
وشفني خسرت الكاس يوم الكسايب
ماكـل شـي" لابغيتـه تنـولـه
تمشي وترجع باخر الوقـت خايـب
اخذت لي في نعمـة الحـب جولـه
وتغيـر الواقـع بليـا سبـايـب
واصبحت اعرف الحب عرضه وطوله
وعرفت وش معنى الجروح العطايب
حب الطفوله يوم وصـل الرجولـه
تبدلت حالـه وشفـت المصايـب
بس انت حاول قدر الامكان تولـه
لوني على مركاي والـراس شايـب
انت بخفوقي لـك ربـوع وحمولـه
وابشـر بعـزك لوتهـب الهبايـب
انا انتظـر؟ لـو اليديـن مغسولـه
وسلم على رمشك عطيب الضرايب
وعـزالله انـي لاذكـرت الطفولـه
ودي اعود طفل لو صرت شايـب
22- الشاعر : حمود البراهيم
على ذكراك ومن لهفت عيون(ن) ودهالقياك
تخيلتك على شاشة خيــــال الفكــر قدامي
توقعت انها لحظة وصــــــال وصــــادقه وياك
جمعت لك اروع اوراق الغلاءفي غفلةايامي
قضيت الليل مع وقع الخيال ولالحقت اقصاك
اقلب صـــــورتك فى نـــاظر(ن) غبتى ولانامي
تهادى نظرتى مابين طرفك والهدب وشفاك
تــلاشى بين وجنات الخدود ونحرك الزامي
الهت فيك العيون وسطرت بهدابها ذكراك
عساها تلتهي بك عن خيال راح مادامي
تنحى بك خيالك بعد ماطــال اللقاءوخفاك
على ضوءالشروق اقراءحقيقة نشوة احلامي
دريت اني اعيش اوهام قلب ماقــوى فرقاك
شكى فى غيبتك جرح الزمــان وهم والامي
حياتى ينحنى ضيم الليـــال وشقاء لرضاك
يتوق لك الخفوق اللى شقى بالحب ونظامي
حيــاتى كل مامرت على قلب العنـاء طرياك
تجــدد بة صــوابة ونفتح بة جرحة الدامي
حياتى كان تيارالغلاءوالشوق ساق اخطاك
على نفس الطريق اللى تلاقت فية الاقدامي
انا كلي امل وانت الامل يمي تجي برضاك
لعلك في وصالك تحيي اوراق الغلا الظامي
23- الشااعر : يوسف الأسود
من يوم عمرك عشر وانته بعيني كبيـر(000)وانا بعمرك وساوي في عيونـك بلـد
صغار نمشي على الفطرة ونلعب كثيـر(000)واكبر طموحتنـا انـاء نسولـف بعـد
صغار ماهمنا اللي حولنا ويش يصيـر(000)كلن يسولف على الثاني وياخـذ عهـد
واسرارنا كلها متجمعـه وسـط بيـر(000)وسط الصدور اتجمع ماتسولـف لحـد
اثنين ماكان فيـة اول ولا فيـة اخيـر(000) متساويـن بغلنـا بيـن ذخـر وسنـد
والناس من حولنا اصحاب في كل خير(000)انقدر النـاس ونساعـد ونغلـي فهـد
مشى الزمن هكذا حتى اللقـاء الاخيـر(000)يومة وصل بس ما عني وعنـة نشـد
والموت كسر اشداد الوقت وارغى البعير(000) وكثرت سكاكينة اللي مـا تعـد بعـدد
جلست اسولف مع الواقع بصدرن اسير(000) استيسر الحزن ذاتـة ليـن همـه ورد
من يوم عمري عشر وانا بعينك كبيـر(000)وانتة بعمري تسوى فـي عيونـي بلـد
24- الشاعر : العريض
اللي لها بالغلا قـد ر ومقـام ٍ رفـاع=بكل المقا ييس ماحد حطم ارقـا مهـا
ماحد تعلاّ سواها فوق عرش النـزاع=في عرش قلبٍ عجز يحتال بأحكامهـا
تلعب بقلب ٍ طواه الشوق لعب الرضاع=يوم استحلت خفوقـي رزت اعلامهـا
يوم انتشلني غلاها من سنين الضيـاع=ليلة ذبحني شعور الخـوف.. قدّامهـا
يوم اقبلت قلت يالبيه و ا مرك مطا ع=اقفت ليال الحزن لا عادت ايّـامهـا
جتني وهي مرهقه من قـوّة الأندفـاع=في يدينهاورده ودفتـر ومـرسامهـا
جتني بجبروتها الطاغي وقلب ٍ شجاع=فـي كبريائهـا وحشمتهـابهند امهـا
في طهرها في حياها زايـد الأرتفـاع=في ظعفها العاطفي في قـوّة الهامهـا
جتني وانا اقاسي الشده ومر الصـراع=جت تشتكي جرحها يوم الزمن ضامها
قريت بعيونها شوق وسفـر وانقطـاع=ملا مح الحزن اشو فه بـدداحلامهـا
واقفت وانا جرحي الدامي يزيد اتساع=والروح عيّت تطيق الصبربصيامهـا
25- الشاعر : عبد الله المظهور
للشعر دور .. وله مواقف .. وحـزه
دوره إيبيـن بـالامـور العسـيـره
والشعر لامن جـاه شـي(ن) يهـزه
ياقف .. عسى في وقفة الشعر خيره
ونفسي تراهـا ياالخـوي مشمئـزه
غير كلامك .. واعطني شـي غيـره
ولاعاد تنشدني عـن علـوم غـزه
العين تدمـع .. والايـادي قصيـره
وحنا العرب .. ماغير كشخه .. ورزه
وكلن على امريكـا يدربـي سفيـره
كلـن يبيهـا تحترمـه .. وتـعـزه
مع انهـا سـاس الامـور الحقيـره
هي تدفع اسرائيل .. وايضـاً تـوزه
يديرهـا .. واحيـان تبغـى تديـره
ثورن يدفـه ثـور .. واخـر يكـزه
متجمعيـن(ن) كلهـم فـي حضيـره
وحنا مابين اكياس عنبـر .. ومـزه
ناكل .. وغزه بين نـار .. وذخيـره
ولا نزعـج الحاكـم .. ولا نستفـزه
وكلن امير .. ويشتغـل لـه بديـره
وياصاحبي ياابـن الرجـال الاعـزه
ترى سواليف السياسـه خطيـره !!!
لاعاد تنشدنـي عـن علـوم غـزه
غيّر كلامك واعطنـي شـيء غيـره