كريم يابرقٍِ برق ٍمن مناشيه
ساقه صدوق الخيرتال الزماني
يامرحبا به ياعسى الله يحييه
يفزله قلبي من اقصى المحاني
واقوم اخايل بارقه وافتكر فيه
واسهر معه والعمر راحل وفاني
برق الغلا اللي نعش الروح طاريه
جابه قوي الود حتى لفاني
غلا الوليف اللي من الناس مغليه
اقبل كما البارق وخيره غشاني
ماهو بناسيني ولاني بناسيه
ويرحمني الله كان خلي نساني
ياناس احبه بس ماهو بكفيه
حب الشرف ماهو بحب الهداني
حبٍ مع الايام يصدقه يوفيه
وانشهد لنه بالغرام احتواني
غريم واسلك من على مسلك التيه
واقرأ كتاب العشق حتى قراني
واصبحت افسر ويش معنى معانيه
ويش الغرام اللي بجمره كواني
واثر الهوى ياناس مااكثر بلاويه
لاجيت ابنطق نوب يعجز لساني
وانا غرام الزين بالصدق راضيه
مقسوم والمقسوم قسمي وجاني
ذا صاحبي ياجعل ربي يخليه
اسقيته الاشواق وايضا سقاني
واهداني اغلا ود بالصدق واهديه
كل الموده بالخفا والبياني
واعطاني احساسه وانا احساسي اعطيه
واعطيته اشعاري وشعره عطاني
يقول شاريني وانا اقول شاريه
مابيع شخصٍ بالمحبه شراني
واحيا غرامٍ مات ذكره وباقيه
حتى غمرني بالدلع والحناني
وان عاش عمري واكمل الوقت تاليه
ومدالله سنيني وباقي زماني
لاابقى على ظنه وصادق هقاويه
واعّد وقته ساعته والثواني
واجيب له عمر الهناء داخل يديه
والعمر قالوا لي ترا العمر فاني