ياللي سوالفنا معك تطرد الهم
تروي ظما العطشان لو حيل ظامي
لاتسأليني كيف والا بعد كم
هذيت مثلي بالهذو مايلامي
انتي نفـِس روحي وللجرح بلسم
معذور لو اسهر ولا اقدر انامي
اسهر رضا / راحه / تباشير واهتم
لكنّ همـّي برد خالط سلامي
بس اعذريني كان بس اتكلـّم
من بعد عرفك صرت اعرف الكلامي
يالله طلبتك حقق الحلم الاعظم
معاك ياأحلى البشر والاسامي
لاواهني من شاف زولك وسلـّم
شافك قريبه حيل عندي أمامي
يابنت بيت العز والعرق الاكرم
لايابعد خوالنا والعمامي
لو تبعدين ابعد من البعد انا اشم
ريحك وريحانك على الشمّ زامي
ياغيمةٍ مزنـِه تراكم وأردم
ماطاح طشـّه توها به غمامي
يازهرةٍ تاجه عليها مكممّ
اقبل عليها الصبح بعد الظلامي
كم مرةٍ عنها لساني تلعثم
عيا قصيدي لايجي بالتمامي
ليا بديت البيت يابنت ماتمّ
ومن اولٍ شعري جرادٍ تهامي
اعلمـّك والغير والله معلـّم
انـّك نهاية مطلبي والمرامي
واصابر الايّام عيّت تقدم
صار الشهر عندي كما عـدّ عامي
أزجي سلامي لك مع اللّي ترنّم
مذكـّر العشّاق طير الحمامي
واقول له ياطير اسلم وسلـّم
على التي زوّد حلاها احتشامي
قل له ترى عمري فداها مهو دمّ
كلي لها في مطلبٍ فيه سامي